Trainingsweekend in Glarus

FOTOS

Mit dä Privatautos simmer uf Glarus use gfätzt, händ uf dä Autobahn zimli all überholt (zumidäscht wänn mä ime some chliine Flitzer wien ich ghocket isch;)…) und sind bi oisem Trainingsbereich acho. Topmotiviert aber nachli müäd hät ois dänn d Martina empfange und gross MOTIVATION ad Hallewand gschribe. Aber eigentlich hets das gar nöd gross brucht. Dänn nach minere Sicht sind vor allem am Samstig all i Höchstform gsi und händ was welä erreiche und sich steigerä.

Dä Jürg hät oises Iilaufe gnädigerwis sehr ruhig agfange so, dass all langsam händ chöne ufwache und schlussändlich richtig is Schwitze cho sind. Überhaut hät er ois wider luter noi-i Üäbige zeigt und mer händ mal widr oise ganzi Körper gspürt (vor allem i dä paar nächschtä Täg). A derä Stell äs grosses Dankeschön an Jürg! Schön, dass du immer wieder mitchunsch.

D Grätler sind dän zimli schnäll rächt niidisch ufd Luftathletä gsi. Dänn die händ verusse bi strahlendem Sunneschii chönä traininere wärend dem mir idä Halle nöd würkli vill vo dem Wätter mitbecho händ.

Zum Zmittag sind di Meischtä uf diversä Umwäge acho. S Ässä isch interessant gsi… s mittässendä Aug het vor allem GRÜÄN gseh! Di Schlaue unter ois händ dänn usegfunde, dass das wägem Täller so gsi sich. Er het ä grüäni Verzierig gha. Und am nächschtä Tag hät sich das dän au bestätiget, will passend zude Spaghettisossä häts ä rot-bruni Verzierig gha…

Ufm Rückwäg händ d Grätler dänn schadefroidig grinsäd! Es hät es chliises Summergwitter ge. Hehe zum Glück sind mir idä Halle! Doch nach es paar Minütli hät dä Räge ufghört, s Sünnäli isch widr cho und d Wisä isch (glaubs) tröchnet. Aber mer göneds dä Liechtathletä ja?

Am Abig sind dänn Grüppliwiis all mal richtig Dorf-/Stadt-Chern verschwunde… Ob im Route 66 womä ersch ab 18 inechunt (ussert mä flirtet mitm Türsteher) odr idä andere Bar (womä, wänn mä gschickt isch vomä fründliche Tüp n Mc Flurry bechunt), isches cheibä glatt gsi.

Ächtz! Stöhn! Wiso gits uf derä Wält au so vill Stäge?!? Mitmä riisä Muskelkater hät dänn dä Sunntig agfange. Doch irgendwie händs all gschaft trotzdem ä gueti Leischtig anezbringe. Bi dä einte hät d Motivation chli glötterlät aber wills ja allne gliich gangä isch hät sich das Tüüf widr chli ufglöst.

Ich glaub mä chan säge, dasmer zimli vill gleischtät händ und jede weiss (nöd nume wägem Muskelkater) daser öpis glernt hät und überall widr chli wiiter isch. Ich hans super gfunde, dass so vill mitcho sind. Ich hoffe au, dass all gschnallt händ, dasmer nume so wiiterchömed und jedem sin Iisatz zellt! D Turnfäschter chömed glii… Dünd oi doch wiiter in A… chläme, chömed is Training und mached mit! Dän wämmer gueti Leischtige erbringed wirds Fäscht nachene umso grösser und umso meh stiigt d Motivation um na besser z werdä oder zum widr öpis nois z lerä.

Bis im Training, nati

P.S.: Wer hät alles vom 6i-lüütä-Marsch troimt?