Turathlon

FOTOS

Juhui, d’Freiluftsaison vo de Liechtathletä hät aagfange!
Am Samschtig hät uf de noi renovierte Aalag im Sihlhölzli z’Züri de Turathlon stattgfunde.
S’Wätter hät mitgspillt und mir händ scho gli gmerkt, dases „Flugwätter“ chönnt werdä.

De Willi hät am Wurfmehrkampf mitgmacht, en 3-Kampf innerhalb vonere Stund. I de Chugle hät er e Wiiti vo 9.28m erreicht, de Diskus isch 23.20m wiit gfloge und de Speer hät de Bode nach 47.15m wider erreicht.
Die Leischtige händ de Willi uf de 2.Platz bracht und zeiget, dass d’Formkurve vor allem i sinere Paradedisziplin Speer stimmt.

Ich (Martina) han en Sprungmehrkampf gmacht, wo ebäfalls uf 60 Minute Ziit limitiert gsi isch.
Im Wiit hani mit 5.27m mini PB egalisiert, im Hochsprung isches dänn mit 1.60m nöd grad guet gloffe. I de letschtä Disziplin, em Stabhochsprung isch dänn defür e noii PB dringläge und ich han mich mit mine übersprungne 3.20m grad für d’Schwiizermeischterschafte im Juli in Olten chöne qualifiziere!
Ich han de Sprungmehrkampf chöne für mich entscheide und han mis erschtä Priisgäld dörfe mitheinäh.

D’Priska hät i ihrem 5-Kampf dänn grad richtig uuftrumpft!
Aagfange hät sie de Wettkampf grad mal mitere PB im Wiit: 5.25m.
D’Chugle isch bi 9.86m wider glandet und dänn isch au grad scho de Hochsprung dra cho.
Es isch ja ebä Flugwätter gsi und drum isch au im Hoch e noii PB vo 1.53m dinegläge.
Ja und will sich PB’s na rächt guet aafühled, hät d’Priska au im Speer e noii Beschtleischtig grüert: 34.10m.
Im abschlüssende 300m Lauf isch nach 47 Sekunde dänn ändlich s’Ziel chound s’Liide hät es Ändi gha.
De Iisatz hät sich aber uf all Fäll glohnt, au d’Priska hät mit ihrem 2.Platz na dörfe en Batze heinäh.

Es isch en super Wettkampf gsi, so Leischtige sporned eim für wiiteri Höheflüg aa!!