Regionalmeisterschaften Bauma, 2./3. Juni 2007
Piip-Piip-Piip… Früä händ mer usnahmswis mal nöd müäsä starte… aber im Car, im Stau mit ere super Alarmalag idä Ohre, womä anschiinend nöd chan abschalte, will s Grätli irgndwo unde im Gepäck liit, ja das hettis nöd unbedingt brucht;) jääänu! Was sölls…
Uf jede fall sind mer begleitet vom wunderschön rägnerischä Wätter in Bauma acho und händ ois für dä ersti Wettkampfteil chönä easy parat mache. S isch chli en spezielle Alas, wills ja gar keis Turnfäst isch sondern ä Meisterschaft und jedi Disziplin einzeln gwerted wird. Pro Disziplin händ mindistens 8 Personä müäsä starte, demit mä die Rangliste isch und so werdet mer bi einige Liechtathletik Diszipline usser Konkuränz starte…
Grad am Afang händ vier LA’s iri Tenus bim Hochsprung dörfä durchnässe, da d Matte ja scho länger verusse gläge isch. Aber a guete Leistige häts die vier nöd ghinderet. D Sarah isch 1.35m cho, d
Cornelia 1.40m, Martina 1.65m und dä Roman 1.80m „Süper“
Au adä Schaukelring händ d Grätler alles ge. Zwar isch d Note nöd ganz so wie erhofft usgfalle (8.97) aber schlussändlich sind mer doch ufm 3. Schlussrang glandet, was ja nöd nüt isch... Und au
oisi Speer Herre hät dä Räge nöd wiiters gstört und si sind zwüsched 38 und 45m wiit cho und händ ä Note vo 8.72 becho.
Dä zweiti Wettkmapfteil isch us Pändelstaffette 80m, Team Aerobic und Steistosse zämägsetzt gsi. Oisi Staffettler sind sich zwar s Ränne uf dä Wise gwönt gsi, aber bi ois da im Schlüächti hät
halt kei Schlag- odr Matschlöcher im Bode, wo mä Haggesprüng mus mache und ja… eventuell het das ä chlii dra ghinderet, dass nöd ganz so gschwind wie im Training gsi sind… wer weiss… Si händ
immerhin alles gä und sind idä Mitti vodä Rangliste vorzfinde gsi. Rang 24, Note 8.20.
Au im Aerobic isches nöd ganz so gloffe, wie mer das vorgha händ… ich han zwar nüt dävo mitbecho (?!?) aber anschinend hegs es paar abstürz und ähnlichs ge, wo bide Kampfricher nöd soo acho
sind;) Aber däfür händ mer osi noiä Tenus grad mal schön dörfä dur dä Dräck zie und hoffed, dass si sich nöd so wunderbar verfärbed wie die vo letschtmal… Mer sind dän doch na 5. worde miteme
8.78.
Au im Steistosse häts nöd ganz für äs Podestli glanget…aber oisi vier Dame und Herre händs uf Rang vier bracht mitere Note vo 8.68.
Im dritte Teil isch dänn d Grätkombi adä Reiä gsi und siehe da! Det händs ois ä hammer Note ge! 9.17 was ois dä 7. Rang vo 27 teilnehmende Verein bracht het! Ez aber bitte so wiiter! Chönd das
hoffentlich in Frauefäld widerholä!
D LA’s sind im Schlüüderball au namal gnueg Lüütlis gsi und händ grad mal dä Scheff usäghängt und sich gschwind Gold erschlüderet! Si händ äs 9.26 becho und chönd sich zum Abschluss vom Tag ufd
Schultere chlopfä. Na besser sinds im Chuglestosse gsi aber leider sinds halt det au total usser Konkuränz gsi und so bringt ois das super 9.30 idä Rangliste nüt, defür isches n super Asporn fürs
Eidgenössische na es paar cm wiiter zcho!
Jo, nachem Fotitermin im Biergarte und nachem gmeinsame Znacht sind mer dänn zum vierte Wettkampfteil übere und händ im Fästzält und idä Baar Party gmacht! Ich glaub dadefür langet mal widr d Föteli und di vilä Erinnerige (wo doch hoffentlich na all händ… odr?). En Dank a dere Stell ad Band! Ganz geil gsi und natürli au an Würfel, Beer und Robin fürd Underkunft im Hoistock und dänn na fürs Fässli am Sunntig im Restaurant Schwendi
Druckversion
