SM Steinstossen in Seewis

 

 

FOTOS

 

 

Vor 2 Jahr bin ich scho mal a de Schwiizermeischterschafte im Steistosse gsi. Es isch grad so gäbig i de Nächi gsi. Das chan mer vo dem Jahr nöd würkli behaupte…
Aber d’Michèle hät bi de Priska und bi mir gueti Überzüügigsarbet gleischtet und ois überredt zum mitmache.
So hämmer ois am früene Samschtigmorge uf deWäg is Prättigau gmacht. D’Marina Birrer isch oise Fan Nummere 1 gsi.
Als erschts hämmer dänn bi Rägewätter es Käfeli, Gipfeli und grad no es Stuck Chueche verschlunge, ganz nach Steistössermanier. Gar nöd nach Steistössermanier isch oises Iilaufe gsi. Di meischte händ nur 3x d’Arme kreiset und händ chli Dul-X iigribe, aber mir sind bim Iilaufe sogar chli z’schwitze cho!
Am morge händ d’Qualifikationswettkämpf stattgfunde. Mir händ im 6kg und im 12.5kg stosse mitgmacht. Im 6-er isches dänn oisem „Alpha-tier“ de Michèle nöd wie erwünscht gloffe und mir händ oisi Chance uf en guete Platz i de Gruppwertig gseh schwinde….

Im 12.5-er hät d’Michèle dänn all Agressione usegla und de Stei uf 6.12m poltered.
Öppe am 3 isch dänn bekannt worde wer wo im Final (jewiils di beschtä 8) staht: im 6-er sind d’Priska und ich debii gsi. Mir sind beidi nüme a d’Resultat vom Morge anecho und händ ois miteme 6.Rang (Priska) und eme 7.Rang (Martina) müese begnüege.

Im 12.5kg Final hämmer grad alli 3 namal mitgmischlet: Vorem 3. und letschtä Durchgang wär ich ufem 3.Rang gsi, han mich dänn aber chöne steigere und han mit 6.18m d’Füerig übernoh. D’Claudia Bosshard vom TV Birmensdorf hät mich dänn i ihrem letschtä Stoss um 4cm gschlage und isch Schwiizermeischterin worde. D’Michèle isch nümm ganz so kraftvoll gsi wie am Morge und isch mit 5.97m 4.worde. D’Priska hät sich im Vergliich zum Morge namal chöne steigere und isch mit 5.62m ufem 6.Schlussrang klassiert worde.
Leider häts bim 12.5-er Stei kei Gruppewertig gä, die hettemer klar für ois entschide.
I de Gruppewertig vom 6kg Stei hät ois s’ Team Basel knapp de Meischtertitel vor de Nase weggschnappet.
So hämmer für nächscht Jahr es Ziel und hoffed, dass im 2008 es paar Winiger und Winigerinne meh mitmached. Es isch en glatte und unkomplizierte Aalass. Mir händs uf all Fäll gnosse und sind, wäg all denä Pokäl wo mer händ dörfe fiire, mit scho es bitzeli „runde Schueh“ am spötere Abig dihei, respektive am Watterfäscht aacho!!
(Brichterstattig: Martina, Fotos Marina B.)