Trainingsweekend in Willisau, 21./22.04.2007

FOTOS

Wiso au immer soooo früäh? Jedes Jahr di gliich Frag. Aber das isch halt wäg dä Fahrt. Afange duet di erst Lektion ja ersch so um di Nüüni und das isch ja widrum human.

Dä Jürg het ois ganz sanft na ganz ufwache laa und ois widrmal zeigt, wie speziell mä äs Iiturne doch chan mache (wänn mä ä Stund däfür chan uufwände…). Irgendwie hät mer am Afang nöd würkli s Gfühl, dass mä dur die üsserscht eigewillige Üäbige überhaupt warm wird…aber schulssändlich isch mer dänn tiptop vorbereität zum afange Traininere!

S Wätter isch aber au dä Hammer gsi! Fasch teilwiis zuu warm (aber mer wänd ja nöd klage). Und gnau so super wie s Wätter, isch au d Teilnahm a dem Weekend gsi! Am Samstig sind ca 40 Lüüt ume gsi und am Sunntig gar geg di 50! Wow! Han gar nöd gwüsst dass mir äso vill Peoples sind. Wänn die all chömed chönd mer ja fascht zwei mal idä 1. Stärkeklass starte…

S Ässä isch das Jahr nöd so grüän usgfalle wes letscht Jahr, was glaubs die meischte doch zimmli gnosse händ! Au händ mer dörfe verusse ässä under em grosse Sunneschirm und so händ au d Grätturner wo süsch meistens idä Halle sind au was vo dem super Wätter gha.

Au dä Abig isch rächt glatt gsi. Es super Bierfäst het in Willisau stattgfunde mit x verschidene Biersorte und ere live Band. Aber kei Angst… Mer händ ois all zäme gno, da mer ja am Sunntig widr idä Halle händ müäsä stah und dä zweiti Tag bekanntlich immer chli meh  Chraft vo eim vorderet. Aber wänn grad drüü Geburtstag händ, dänn dörf mä ja scho gschwind goge astosse…

So, und jetzt danket mir doch all emal am Jürg, dass er ois erscht am Sunntig di krasse Iiturnüäbige la mache het und nöd scho am Samstig… so isch dä Sunntig-Morge-nachem-Uusgang-Muskelkater nöd ganz so brutal gsi wie a vorgängige Trainingsweekend wod ächt nöd gwüsst häsch, wied jetzt überhaupt na söllsch uufstah…

Au dä Martina und dä Marion es Danke für di ganzi Organisation und natürlich allne Leiter und Leiterinne wo vill für ois vorbereität händ, natürlich am Jürg, daser ois obwohl er ois so guet kännt immer widr begleitet und allne wo mitcho sind, will ja süsch nöd traininert werde chönt