Eidgenössisches Turnfest Frauenfeld 22.-24. Juni 2007

FOTOS:

Freitag, 22. Juni 2007

Samstag, 23. Juni 2007

Sonntag, 24. Juni 2007

Mitm Zug sind mer am Fritig am Mittag use uf Frauefäld gfahre… zimlich vill Verein sind unterwägs gsi und so isch d Stimmig bereits rächt locker und lustig gsi. In Frauefäld händ mer dänn oise gross und chlii Scheff gsuecht, demit mer oisi Fästcharte widr becho händ und ab zudä Wettkampfplätz händ chöne.
S Aerobic isch inere uhuerä hitzige, markant duftende Halle gsi und häsch würkli s Gfühl gha segsch grad idä Sauna glandet. Aber jänu…mer händ chöne dusse iiturne und händ sogar mal froid a dene Vereinsmusigwägeli gha, dänn mer händ dörfe über die oisi Musig abspile la und so s Programm duremache. Ja und das isch dän au zimli guet gloffe, wie mä ahand vodä Note gseht 9.22!
Während dere Ziit het au d Pändelstaffette stattgfunde und mer sind mit ganze 14 Lüüt gstartet und händ s Beschtä ge! Und händ doch immerhin es 8.64 becho.
Däfür ischs Steistosse super gloffe, was ois es 9.39 bracht het und somit händ mer die 36 Zähntel meh als locker usegholt zum oise nüüni Durchschnitt zha…

Im zweite Wettkampfteil isch dänn Schlüderball agstande womer mit sibäLüüt aträtte sind und ja, gschlüderet händ… au detä isch s Ziil erreicht worde und d Schlussnote isch ufme 9.15 gsi. Gar kei Sach isch dänn s Chuglestosse gsi… (Ich glaubs hauptsach öpis schwärs wägstosse und oisi LA’s sind happy…) ä herrvorragendi Note vomene 9.45 händ oisi Chugelstösser und Stösserinne becho und händ sich chönä ufd Schultere cholpfä.
D Grätler händ sich während dere Ziit dänn fürd Grätkombi iigwärmt, demit au det alles paletti gat. Und s het passt! D Kampfrichter sind ändlich mal mit dä Programmzämästellig zfride gsi! Und turnt isch au guet worde, dänn es 9.04 het für die 24 GK-peoples usegluegt.

Ja und scho isch dänn au dä dritti Wettkampfteil agstande. Als erschts isch dä Speer dra gsi. Leider häts nöd ganz für es Nüüni glanget. Aber es 8.97 isch mit chli Augekneife doch sozäge es Nüüni!
„Los, ez holed mer ois es 9.40!“ hät oisi Ringscheffin vorem Wettkampf gfunde! All händ grinsed, sind iigstande, händ sich konzentriert und dänn afa turne… Nöd schlächt händ mer dänn all glueget, wo oisi Note bekannt ge worde isch. Äs 9.47!!! Hammer!
Gschlosse isch dänn nachem Ringprogramm dä ganz Verein zudä Hochsprungalag übere, wo wägem Räge d Startziit chli verschobe worde isch. So händ mer dänn oisi vier Hochspringler chöne afüüre und si chli ufepushä. Und so zum Abschluss und wohl wäg dä geile Stimmig händ mer dän oisi Tageshöchstnote vomene 9.50 gholt.

Voilà, oises Ziil händ mer erreicht! 27.58 Pünkt!!! Ich glaub ez münd mer uf 28 Pünkt ufä, hehe!

Ja und dänn isch natürli s Fäscht losgange… es uhuerä durenand und riisä Züg isch das ja gsi. Aber geil! Und irgendwie isch doch fascht dä ganz Verein mitenand am fiire gsi und so isches huere glatt worde.

D Schlafplätz sind unterschidlich gsi. Vo Zält - über (odr under) Brugg – zu gar nöd schlafä odr idä 24h Bar chli d Auge zue due…

Ja, am Samstig isches dänn wiiters gange. Nöd mit Wettkampf aber mit zueluege und fäschtä. Di einte sind uf Ellike as Dorffäst, di andere händ d Sektione, wo am Samstig na gstartet sind glueget. Und am Abig ischs Fäscht anschinend na verreckter gsi we am Friitig, dänn d Massä heg eifach mitgrisse… und mä isch halt eifach debi gsi.

Aber ich wett ez na churz dä Sunntig aschnide! Was dä Tag dur in Frauefäld gloffe isch weisi nöd… aber am Abig isch dänn dä Dorfiimarsch gsi, womer all brav im Glichschritt und i Viererreihä absolviert händ. Isch scho immer widr schön vo allne in Empfang gno zwerde, durs Dorf zlaufe, dä Lüüt zuewinke und dä Fahnebegrüässig  zuezluege. Ich liebe dä Fahnemarsch! Nachem Ässä sind namal all Einzelturnerinne und Turner geehrt worde und dä Abig isch locker uusklunge…