Eidgenössisches Turnfest Frauenfeld ViRus, 17.06.2007

FOTOS

„Alles geili Viire – schalalalala – mir sind alles geili Viire – schaalalalalala“ em ja, lönd mer das…

Mit oisne Kostüm und Chistli sind mir Aerobicler am Sunntig 17.6.07 use uf Frauefäld zum bim viRuS mitzmache. S erste amüsante isch mal oise Obervirus gsi, wo das namentlich us Dateschutzgründ nöd erwähnt wird… Aber frisch und fröhlich hät er ois am Morge bereits uf sine Kängurustelze begrüässt und gweckt wer nani wach gsi isch.

In Frauefäld händ mer dänn oise VIP Bereich becho mit Privatsecurity, wies sich natürlich für VIP’s ghört!!! Mir händ au ä spezielli Begrüässig übercho und händ speziell lang ufm Fäld dörfe verwiile… Und au allgemein sind mer bekannt gsi. Überall hät gheisse ah, ihr sind ez dä Virus und oh, so gseht de us, etc. rächt ä amüsanti Sach gsi die ganzi Akunft ufm Fästgländ.

Dän isch aber ernst worde. Di ganze 90 Minute sind eimal dureprobet worde und mir, wo nach all 2-3 Nummere dra cho sind händ dörfe secklä. Dänn je nachdem sind mer im Eggä vorä rächts odr hinde links gsi und dänn widr alle vore links und da mer ja nöd durs Stadion händ chöne ränne, wäg dä Vorfüärige verstaht sich, händ mer jedes Mal usse ume müäsä. Aber mir sportliche Lüüt händ das natürli locker uf ois gno. Naja… dä Pelz und Samt het scho chli warm ge… und d Sunne het au zimli abebrännt… und d Ziit isch mängisch au knapp gsi… und im Schatte händ mer au nöd immer chönä stah… und zwüscheddure händ mer ois na fürs Team Aerobic Programm müäsä umzieh und dänn widr is Virusgwändli retour umzieh und ja chli is schwitze sind mer villicht doch cho und bitzeli usser Atem sind au mir nach dene 90min gsi. Aber mer händ ja dänn ä halb Stund Pause gha, bevor di wahri, live Vorfüärig mit Fernsehüberträgig stattgfunde het. Und det händ mer dänn namal meh we alles müäsä odr besser gseit dörfä ge.

Aber ehrlich sisch, wän ich das so dörf säge, uhuerä zgeil gsi! Mir sind absolut s Partytrüppli gsi und händ d Stimmig glupft, was ja au oise Uuftrag gsi isch. Aber ebe nöd nur während dä offizielle Vorfüärige, sondern au während em warte odr rundume ränne händ mer alles ge und da ois d Sunne chli fescht uf d Pelzperückä gschune het sind mer je länger je meh i Fahrt cho.
So isch au s Astosse nachene, sowie d Heireis und oise königlich Iizug is Räbblüätefäscht Party puur gsi und dä Alass glunge.

Ich froi mi bereits uf dä Video Abig! Hans nämlich nani gseh…