Chränzli 2008

Und scho isches widr verbii… heissts us villne Müüler. Debi hät mä so lang druf gwartet und planet.
Da mer ja dasmal widr in Winige im Singsaal sind händ dä Wirtschafts- und Bauchef sowie Ton, Liecht, Dekoration, Tombola und all andere Mithälfer zersch mal müäsä alles noi inspiziere. Chan mä d Bar und d Garderobe widr gliich ufstelle? Wie dünd mer dän die Tisch im Saal aordne? Wieviell Platz händ mer ide Chuchi? Wie chunt dä Getränknachschub id Bar? Wo stelled mer all Grät hi womer uf dä Bühni bruched? Händ mer Platz fürd Tombola und wo bringed mer dä roti Fade under? Alles het zersch mal müäsä überdänkt werde.

Aber natürli hät s Chränzli OK au zersch es Thema müäsä finde. Fieber, wie mer ja all scho lang wüssed. Die einzelne Riege händ ihres Thema becho und sich über Musig und kreativi Umsetzig gedanke gmacht. Dä roti Fade indes het sich en passende Sketch überleit. Wenn mä d Idee mal gha hät dänn gats drum die uszarbeite und natürlich sine Lüüt biizbringe. All Jugendriege und dä TV sind flissig am Probe, demit das dänn uf dä Bühni au guet usgseht.

Ja und dänn isches ufeimal sowiit. Hauptprob… Chindervorstellig… Am Namitag go ufstelle für dä 1. Samstig, denn fast alles widr verrume, demit s Oberstufeschuelhus en einigermasse normale Schuelbetrieb chan abhalte, dänn am zweite Weekend widr am Mittag go ufstelle und Friitig und Samstig durezie. No am Samstig Abig odr besser gseit Morge wird dänn alles verrumt so dasmä scho bald nüt me vom Chränzli 2008 gseht. So gschwind chans ga…

Aber wänn mä dänn chli nadänkt, dä Ziitigsbricht list, uf dä Homepage Föteli alueget, mit dä Mitwürkende odr Zueschauer namal drüber redet und sich i eim sones guets, agnehms Gfühl usbreitet, dänn weiss mä, dases sich doch glohnt hät so vill Ziit für oises Winiger Chränzli z investiere. Und wie mer so sind froied mer ois scho all ufs nächste Jahr wänns im Novämer widr Ziit fürs Chränzli isch.