Turnfest in Rupperswil, 14./15. Juni 2008

Fotos

Ändlich mal nöd i aller Herrgottsfrüäi ufstaa zum anes Turnfäst zga! De chan mä gmüätlich uspfuse, zmörgälä und sich dän mal uf dä Wäg mache ohni zspat cho, hehe!

Rupperswil isch richtig härzig gmacht gsi. Es gmüätlichs Fästzält inklusive (psoido-)Bar, en Grill, irgendwo namal es Bierzält… und natürlich d Wettkampfplätz wome nöd dörf vergässä!!! D Liechtathlete händ ächli meh müäsä im Züg umewanderä und händ Alage i unterschidlichste und interessante Verfassig gfunde… aber was solls! Mä findet sich demit ab und gits Bescht!
Und beklage chönd mer ois mit oisne Note ja nöd! Nur mit dä Verletztä und „Chranke“ aber zu dem wäns sowit isch.

Die Pändelstafettä 80m het oises OT immer so schlächti Vorahnige aber ich mus säge ihr händ oi doch mitme 8.46 wacker gschlage!!! Na all es piiitzeli gschwinder und dänn händ mer 8.50! Im Steistosse sind mer irgendwie au immer so Hirschä… ich glaub ich wür dä Stei eifach uf mini Füäss rüärä aber mer händ ja Profis debi wo adä SM teilnemend und  drum ä verdienti super Note: 9.34! Im Aerobic isch d Arena au zimli witzig gsi! Händ eigentlich dasmal imerhin alli gradusglueget? Isch uf jedefall witzig gsi und d Kampfrichter händ weniger Fehler gseh we mir sälber und ois es 9.25 ge.

So, zweiti Wettkampfteil mit dä erschtä Verletzig, wänn ich da nüt durenand bringe. Claudia het sich leider bim Schlüderball dä Fuess verdramped odr so ähnlich und ja isch dä Rescht vom Tag chli am humplä gsi. Trotzdem händs na es 8.61 usegholt. Defür händs dän im Chuglestosse grad nadopplet und fascht äs Zäni anegrüärt… 9.43 mus mä zersch mal namache!!! Die Grätkombi sind mer unterdesse chli am umehüenere gsi, denn es het ois irgendwie schüch chli Material gfählt. Aber d Marianne het das churzerhand klärt und die Herrä Wettkampfplatz händ ois dänn alles bracht womer händ wellä (au wänn mer gwüssi Matte nöd het chönä chläbe, und vo zwei strahlende Mädels händ müäsä ghebt werde… Egal. Mer händ ois müä geh (chönd ois aber glaubs na einiges meh müä geh…) und es 9.27 usegholt.

Dritte Wettkampfteil mit Hochspurng, Speer und Schaukelring isch denn na agstande. Souverän händ mer das erlediget und oise nüüni schnitt tiptop ghebet. Hochsprung es 9.08, Speer es 9.05 und Ring es 9.37. Leider isch dä Abgang nöd so super mit Wälle gsi, wie mers ois gwönnt sind sondern mit dä Michèle, wo am Bode ligge blibe het und si het definitiv kein Jubelschrei abgla… Im Limmi isch si am Abig na glandet und het den am Mäntig es MRI müäsä mache, will s röntge nöd vill bracht het und isch jetzt mal am Abwarte was so chunt. Gueti Besserig a derä Stell und wer es gschids Buech, en Gameboy es Zämäsetzli odr süsch es Knobbelspiili het dörfs ire gern emal verbiibringe!

Mir sind dän in 4. Wettkampfteil gstartet und händ mitm Hansueli Leemann Geburi, sowie mit andernä Vereinsgspöönli anderi schöni Aglägeheite gfiiret,… D Band und s Fäscht isch super gsi, d Nacht im Gwächshuus odr i süschtige Underständ am Wätterentsprächend frisch und d Beiz am Suntig het ois abgseh vonere Tote Flüüge super bedient!

Mer froied ois jetzt doch eifach uf Herisau, hoffed dasmer kei Angina bechömed und gänd nachli meh Gas, dänn oises Limit isch na längst nöd erreicht und jede weiss sälber wo, dass er sich na verbesserä/steigere chan!!!