Bündner Glarner Kantonalturnfest in Maienfeld, 26./27. Juni 2010, Einzel

1 Wuche vor de Sektionswettkämpf sind es paar Turner und Turnerinne vo Winige go d’Aalage in Maienfeld uuskundschafte und teschtä….
De Robin hät im Gräturne im K6 turnet. Under anderem hät er di sensationelli Note 9.85 a de Ring useturned.
De Grätwettkampf hät für eimal nöd inere Halle sondern dusse underem freie Himmel bi öppe 30° stattgfunde.
De Robin hät mit sim Iisatz für di erschti Winiger Medaille gsorget und hät de Wettkampf ufem starche 3. Rang beändet!
Ebefalls am Morge i i de LA de Flamur am Start gsi. Er hät en durzogne Wettkampf zeiget. Bim 100meter, i de Chugle und im Hoch hät er gueti Leischtige zeiget. Bim Wiit isches gar nöd uufgange und er hät 3x überträtte. Drum hät ihm au di letscht Motivation für de 1000-er gfehlt, was mer au a de gloffne Ziit gseht.
Am spötere Namittag sind dänn d’Fraue im Iisatz gstande. D’Joli, d’Cornelia Jakob und d’Martina sind guet gstartet. Im Hoch isch d’Joli PB gsprunge (1.25m), d’Cornelia ändlich wider mal 1.45m und d’Martina 1.65m. I de Chugle hät d’ Joli ändlich zeiget, dass au sie über 8m chan stosse! De abschlüssend 800-er isch wie immer e Qual gsi, vor allem im Voruus isches de Fraue sterbenselend gsi… Aber irgendwie ghörts halt eifach zumene Mehrkampf.
Leider häts i de LA kei Rangverkündigung gäh…drum hät mer nöd gwüsst weli Räng dur de TVW beleit werded.
Am Sunntig sind de Köbi, de Michi und d’Martina im Turnwettkampf im Iisatz gstande. I verschidene Diszipline händ die 3 um gueti Note kämpft, under anderem mit Haarspray a de Schuehsohle im Unihockeyslalom.
De Köbi und de Michi händ bim 80m d’Pendelstafette-aalag grad mal uusteschtet und d’Martina isch nachem Ringturne in Müntschemir scho s’zweite Mal is Turngwändli gstige für ihri Bodeüebig. Alles i allem en luschtige Wettkampf bi sehr summerliche Temperature. Rangmässig hät en 3. Rang für d’Martina useglueget. Und de Köbi hät de Michi um 1 Rang gschlage.
Gäge de spöter Sunntignamittag isch dänn ändlich mal na d’Ranglischte vo de LA useghänkt worde und es hät de Martina tatsächlich zum Turnfäschtsieg i de LA glanget. Das bedütet, dass oise Fahne samt Hornträger am Sektionssunntig mindeschtens eimal in Maienfeld g’ehrt wird!

Jetzt müemer nur na i de Sektion Gas gäh und dänn luege wie wiit füre dases ois als Verein langet…
Herzlichi Gratulation a alli Teilnehmer im Einzel und Hopp Winige am Sektionswuchenänd!