Skiweekend in Elm, 22./23. Januar 2011

FOTOS

Dä Car uf Elm isch das Jahr mal widr so voll gsi wie no nie. Mä hät ja fascht chöne meine, dass das dä ganz Verein mitcho isch! Alt und Jung und zwüscheddrin isch eifach alles mitcho, was uf es super Weekend hoffe la hät:

Nachdem dänn mal alli am Ziel ufgwacht sind und mer mit oisem Bagasch die Unterkunft diräkt im Schiigebiet acho sind ischs ab ufd Pischte gange! Trotz grosse Befürchtige im Vorfäld häts gnueg Schnee für alli gha und au s Wätter hät meistens en zimli guete Iidruck gmacht. S hät au, wol will all dänkt händ dasmer gar nöd chan fahre, wenig lüüt gha und mir däfür umso meh Platz und s Vergnüäge a jedem Lift grad drazcho. Di verschidene Grüppli sind schnäller, längsämer, flissiger, gmüätlicher, mal na am Skiränne güggsle, odr wie au immer unterwägs gsi. Nachdem all irgendeinisch mal im Karussell glandet sind händ mer ois dänn is Resti verlageret zum Fondue ässä. Mit zvill Chnobli, Kümmel und Brot häts so richtig passt. Zum Verdaue händ gwüssi Wahnsinnige na gfunde si müsed go schlittle… Ob z dritte ufm Schlitte, ällei idi falsch richtig, mehrmals dä Hang därab (Würfel???) oder süsch chaotisch sind dänn doch all am Ziel acho und di heissi Diskussion obmer ez das Ticket widr ufe trotz 2-tagescharte münd zale oder nöd händ mer (oder dä R. aus UE) verlore…

Tja dänn halt retour zu guten Taten is Karussell. Dank ois händs es paar Überstunde dörfe mache und nachli meh Gäld iineh. Obwohl dä „Neu“ nöd ganz nacho isch und d Musig inere Schlaufe ghanget isch hät d Jungmannschaft vom Herr Marti und dä Frau Birrer Tanzlektionä becho und s isch flissig diskutiert, agstosse, igschneebelet, glachet, blödlet, etc worde, bis dänn au di Karussellagstellte müäd worde sind und all go schlafe (oder so) händ müäse.

Au dä Sunntig hät sich vodä guete Siite zeigt. S isch meh oder weniger vill gfahre worde und im Aprèsski dunde bide Talstation schlussändlich na uf dä Stüäl tanzt worde. Di „alti Sektion“ hät glaubs zum erschte Mal i minere Turnvereinkarierä als erschts dä Car ufgsuecht und isch zimli gschwind ipfuset… es git also doch immerna überraschige :D

Mit müäde Bei, vill noiä Informatione und schöne Erinnerige isch di eint Hälfti diräkt Hei und di ander mitme Zwüschestopp ide Linde, wos na en feine Znacht geh hät. S isch uf jedefall e Vorfroid uf di Kommendi Wettkampf Saison gsi. Sowol für ois iigsässne Hase wie au fürs junge Gmüäs.