GLZ-RMS Rümlang, 14./15. Mai 2011
Soooo…. Jetzt isches also sowiit. Na es letschts mal alli Hebeteili teste, namal s Programm duredänke, luege, ob au d Chleider all richtig ahänd und dänn au bitte s Lächle nöd vergässe. Und aja, nöd störe laa, wänn 10 Kampfrichter usseume stönd ( ich glaub das wär mir gar nöd ufgfalle aber jetzt…). Aber ich dänke näb all dä Nervosität und dä Befürchtige händ sich doch all ufs Team Aerobic Programm wo in Rümlang d Premiere het dörfe fiire gfroit. Strahlend und mit vill Elan isch das Ganzi dänn au über d Büni gange und all sind verschwitzt und schnufend us dä Halle use cho. S Publikum hät dankend aplaudiert und mä merkt eifach wie schön dases isch, wänn vill Fans debi sind.
Di meischte händ aber kei Ziit gha zum sich uszruebe. Scho sind d Outfits gwächslet worde und im Turngwändli isch fürd GK iiturnt worde. Da mer die natürlich näbed em Wettkampfplatz nöd mit Grät chönd üäbe, händ mer die so halb Mental abglofe zu dä Musik. Sehr wichtig, demit au jede weiss uf weli Ziit er wo was söt mache. Da s Wätter leider nöd so strahlend gsi isch hend alli Vorfüärige die Halle stat gfunde und es isch eher äng gsi. Mer händ müäse warte, bis alli andere fertig gsi sind bevor mer händ chöne ufstelle. Dänn isch zügig iiturnt worde und au d Grätkombi het s erscht mal vors Kampfgricht dörfe. Dä Ablauf hät gstume, di eint oder ander Ussfüärig nonig so ganz aber im Gsammtbild chönd mer zfride si. E gueti erschti Vorfüärig.
Als letschts sind dänn na d Schaukelring dra gsi. Wänn mä am turne gsi isch hät mä diräkt uf d Tribüne chöne luege, was zwar witzig aber au bitzli ä Ablänkig gsi isch. Au da häts iista gheisse und dänn Dume drucke und alles ge. S meischte isch zimlich suuber gloffe aber mir wüssed au dases na Sache git, womer eigentlich besser chönd. Leider isch zum Schluss dä Dani blöd uf dä Matte glandet und hät sich öpis am Inneband vom Chnüü kaput gmacht. Mir hofffed, dases bald widr besser wird und nöd zuu schlimm isch und wünsched der ganz gueti Besserig!!!
Jetzt händ doch all dörfe d Sunne gnüsse bevors dänn, wod d Rangverkündigung agfange het, wie letscht Jahr afa rägne het. Die Schaukelring mit 8.95, sowei im Team Aerobic mit 9.11 sind mer jewilis 2. worde. Die Grätekombination häts nani ufs Podest glanget aber mitm 4. Platz undere Note vo 8.68 chönd mer au da zfride si.
Jetzt heisst trainiere, fiile, üebe bis zum nächste Wettkampf ade RMS in Dägerle
